bon da gninte

Posted on by

So bravo a far robe che non conta,
go na vocasion par questo
on talento, se diria,
che me fa perdare el fio de quel che fasso,
me perdo nel scoltar na parola nova
e vardar la bocca che la dixe,
come se tuto fosse nato desso,
mai dito prima del ch’el atimo
che no se ripetarà de novo.
Xe l’arte de far castei de sabia,
visini a riva,
sensa vardar l’ora,
e no pensar che a ogni siè riva l’onda,
la sabia se desfa poco a poco,
la magna el fosso e pò el muro,
la porta, el merlo
queo che gaveva vossuo pì cura, resta la sabia, un muceto,
moia e pronta
par n’altro zogar inutile al tempo
e bon par ti
che te pensi e te vedi el beo
nel fare e nel scoltare,
nel vedare e imaginare
l’ogni volta novo
che nel so desfarse
zonta sempre qualcossa dentro
a cavare la sen de no so cossa,
e zontar fame de vivare
sensa guadagno come un bon da gninte.

9 pensieri su “bon da gninte”

  5. Sta poesia la xe na maravegia, na maravegia, na maravegia de quele che te pica el cor !!!

    La conta de quel talento dolze e unòco de incantarse davanti a łe robe picołe, de pèrdarse drio a na paroła dita desso par la prima volta, come se el mondo el nasesse in quel preciso istante. Te si propio un bèo poeta ! 🪉🤗

    grazie al vocabolario ahahahh ciao

    Piace a 1 persona

  8. Bea pensada Sossu, me so domandà se metare na tradussion e te ghe ghe pensà ti. Che piasser de lezarse tradoto🤗

    Na volta scrivevo de pì in pavan e lo smissiavo col toscan, come se costumava da ste parte. Fadiga par mi è fadidiga par chi lezeva.

    "Mi piace"

Lascia un commento

Questo sito utilizza Akismet per ridurre lo spam. Scopri come vengono elaborati i dati derivati dai commenti.