Bianchissa, perla, piera de porta antica, 

luzegar d’acqua,

sera.

Rompe ‘e nuvole a ocidente,

‘na spiera,

 luze zala, rosa, grigia, aria sospesa.

Tra el bombazo tuto speta, 

tuto xe fermà:

dò giosse de piova, el tempo,

lampioni che se impissa pian.

‘Na bicicleta passa, dò tose ciacola,

una xe felisse d’esser inamorà,

la conta, la ride.

E su ch’el tirar longo, un fià de ridarela,

el color riprende in stà sera zala e nera. 

Quel che doveva esser sarà,

a noialtri no resta che spetar.

Se fa strada l’ombra de zalo,

riflesso perfeto d’acqua,

scava su un mondo de soto, 

dove l’omo no ghe stà.

Mejo dise i pessi, 

mejo dise l’alga longa,

e anca un remo lento d’acqua,

dise mejo star de qua. 

Bianchissa, perla, luze, 

persa a vardar ‘e bricole,

‘e rive verdi, 

el zalo del ciel che spiera in grigio, 

e oltre la porta de piera, 

le luci che s’impissa  a segnar la sera.

Riva la note,

tuto xe chieto tra piere e acqua

site le case, i omeni, la citá,

cussì se sente solo l’eco de ‘na voze:

sò felisse, me sò inamorà.